FAQs Complain Problems

Newsticker

Photo Gallery

प्रबिधिमा आधारित भएकोले शुरुवातमा असहज हुन सक्छ, तर महानगरका कर्मचारीसँग यसको प्रयोग गर्ने क्षमता छ — मेयर शाक्य

असार २९

काठमाडौं । काठमाडौं महानगरपालिकाले साउन १ गतेदेखि सञ्चित कोष व्यवस्थापन गर्न सब—नेशनल ट्रेजरी रेगुलाटोरी एप्लिकेसन (सुत्र) मा आधारित लेखा प्रणाली थालनी गर्ने भएको छ । साउन १ गतेबाटै प्रयोगमा ल्याउनु पर्ने भएकोले आजैदेखि सञ्चित कोष व्यवस्थापन प्रणाली सम्बन्धि अभिमुखीकरण थालिएको छ । यसमा बित्त बिभाग, आन्तरिक लेखा प्रणाली शाखाका अधिकारी, वडाका सचिव र लेखापाललाई ४ समूह बनाएर प्रयोगात्मक ज्ञान दिइनेछ ।

सोमबार राष्ट्रिय सभा गृहमा अभिमुखीकरण तालिम शुभारम्भ गर्दै काठमाडौं महानगरका मेयर बिद्यासुन्दर शाक्यले भन्नुभयो — ‘यो प्रणाली लागू भइसकेपछि बित्तिय व्यवहार थप अनुशासित र पारदर्शी हुन्छ । कुन शीर्षकमा महानगरले के काम गर्दैछ? कामको प्रगति कहाँ पुग्यो भनेर नागरिकले थाहा पाउन सक्छन् । प्रणालीमा आधारित भएकोले शुरुवातका दिनमा केही असजिलोजस्तो लाग्न सक्छ तर महानगरका कर्मचारीसँग क्षमता छ । यसलाई सजिलै कार्यान्वयनमा ल्याउन सकिन्छ ।’

जनप्रतिनिधि र कर्मचारीबीच नङ् मासुको सम्बन्ध छ । मेयर शाक्यले थप्दै भन्नुभयो — अधिवेशनबाट पारित भएका नीति र स्वीकृत भएका कार्यक्रमलाई कर्मचारीले निसंकोच कार्यान्वयन गर्नुपर्छ । महानगर निर्माण गर्ने काममा कर्मचारीले जागिरे सोचभन्दा माथि उठेर काम गर्नुपर्छ । मिलेर काम ग¥यो भने परिणाम ल्याउन सकिन्छ भन्ने कोभिड महामारी नियन्त्रणमा हामीले प्राप्त गरेको उपलब्धीले पनि प्रमाणित गर्छ । शाक्यले भन्नुभयो, नीतिमा शंका नगरौं । प्रणालीलाई स्वीकार गरौं । जागिरे सोचभन्दा माथि उठौं ।

कार्यक्रममा महालेखा नियन्त्रक गोपीनाथ मैनालीले भन्नुभयो — महानगरमा खाता सूची र सरकारी तथ्याङ्क बुझेका कर्मचारी हुनुहुन्छ । यसकारण प्रणाली कार्यान्वयनमा शंका छैन । कर्मचारीको जागरुकता, प्रशासनिक नेतृत्व (प्रमुख प्रशासकीय अधिकृत) को अनुगमन, कार्यपालिका÷मेयर÷उपमेयरको अभिभावकत्व र महालेखा परीक्षकको कार्यालयको सहजीकरणले महानगरले यो प्रणालीलाई सजिलै आन्तरिकीकरण गर्न सक्छ, उहाँको भनाइ थियो ।

यस अघि महानगरले सम्पन्न गरेकामध्ये केही कामको प्रक्रिया नमिलेकाले बेरुजु देखियो । अभिमुखीकरणमा बोल्द्रै प्रमुख प्रशासकीय अधिकृत एकनारायण अर्यालले भन्नुभयो — महानगरले सुत्रमा आधारित कार्यक्रम तर्जुमा प्रयास गरेको छ । यी कार्यक्रम कार्यान्वयनको अवस्था मुल्याङ्कन गर्ने अवसर नागरिकलाई पनि प्राप्त हुन्छ । यस अघि जनप्रतिनिधि र कर्मचारीमाथि खर्च गर्ने पद्धतिका बारेमा प्रश्न उठ्ने गरेका थिए । अब यस्ता गुनासाको अन्त्य हुनेछ ।

बित्त बिभागका प्रमुख बुद्धरत्न मानन्धरकाअनुसार सुत्रले बल्कमा बजेट स्वीकार गर्दैन । प्रणालीले कार्यक्रम कार्यान्वयन कार्ययोजनासहितको विवरण माग्छ । प्रणालीमा कार्यक्रम र बजेट राखिसकेपछि यो लक हुन्छ । त्यसपछि परिवर्तन गर्न मिल्दैन । मानन्धरकाअनुसार यसअघि महानगरले चलाउँदै आएको एक्युरल अकाउन्टिङ् सिस्टम (प्रोदभावी लेखा प्रणाली) र सूत्रमा आधारित लेखा प्रणालीलाई छुट््याउने सूचक भनेको खर्च र आय लेखाङ्कन गर्ने समय हो । एक्युरल अकाउन्टिङ् सिस्टममा सेवा लिइसकेपछि भुक्तानी नभए पनि (दायित्व छ भुक्तानी गर्नुपर्छ भनेर) खर्च भएको मानिन्छ । त्यस्तै आफूले प्राप्त गर्नुपर्ने तर समयमा प्राप्त नभएको आयलाई बुक गर्दै यति आय प्राप्त हुन्छ भनिन्छ । तर, सुत्रमा आधारित प्रणालीले जहिले भुक्तानी भयो त्यही समयलाई खर्च भएको र जहिले खातामा रकम जम्मा भयो त्यसै समयलाई आय भएको मान्छ ।

कार्यक्रममा प्रशासन बिभागका प्रमुख नमराज ढकाल भन्नुहुन्छ — महानगरले वेभमा आधारित सेवा बढाउँदै लाने क्रममा नयाँ लेखा प्रणाली प्रयोगमा ल्याउन लागेको हो ।

अभिमुखीकरण कार्यक्रममा राजस्व बिभागका निर्देशक शिवराज अधिकारीले, महानगरले आ. व. २०७७÷०७८ का लागि स्वीकृत गरेको आर्थिक ऐन र यसका प्रबन्धका बिषयमा जानकारी दिँदै आयलाई पनि सुत्रमा आधारित गरिने जानकारी दिनुभयो । महानगरले बाँडफाँड गर्नुपर्ने राजस्वका लागि बिभाज्य कोष स्थापना गरिसकेको छ । हाम्रा प्रणाली पारदर्शी र व्यवस्थित छन्, अधिकारीको भनाइ छ ।

महानगरले २०५७/०५८ अघिसम्म नगदमा आधारित (क्यास बेसिस) लेखा प्रणाली सञ्चालन गथ्र्यो । २०५५ सालमा जारी स्थानीय स्वायत्त शासन ऐन र २०५६ सालमा जारी नियमावलीका आधारमा आ. व. २०५७÷०५८ पछि एक्युरल अकाउन्टिङ् सिस्टम (प्रोदभावी लेखा प्रणाली) थालनी गरियो । अहिले (आ. व. २०७७/०७८) को शुरुवातदेखि सञ्चालनमा ल्याउन लागिएको लेखा प्रणाली सुत्र पनि नगदमा आधारित (क्यास बेसिस) नै हो ।

आज शुभारम्भका अवसरमा वडाध्यक्ष, कार्यपालिका सदस्य, बिभाग र आयोजनाका प्रमुख, वडाका सचिव र लेखापाल सहभागी हुनुहुन्थ्यो । शुभारम्भ पछि आज सबैका लागि संघीय व्यवस्था लागू भइसकेपछिको बित्तिय प्रशासन, बित्तिय उत्तरदायित्व, नेपालको सार्वजनिक बित्तिय व्यवस्थापन, बित्तिय सेवा प्रवाहमा सार्वजनिक नैतिकता, बित्तिय शुशासनका लागि संघ प्रदेश र स्थानी तहबीचको सहकार्य, संघीय सञ्चित कोषबाट वितरण हुने समानीकरण, शशर्त, समपुरक र बिशेष अनुदान सम्बन्धि व्यवस्थालगायतका बिषयमा महालेखा परीक्षक कार्यालयका सहमहालेखा नियन्त्रक रमेश शिवाकोटीले प्रस्तुती गर्नुभएको थियो । प्रस्तुतीमा बैदेशिक सहायता र ऋण लिने अधिकार, स्थानीय तहको बित्तिय अनुशासन र घाटा बजेट, आर्थिक प्रशासन सञ्चालन गर्ने कानूनका बिषय पनि समावेश थिए ।

साउन ७ गतेसम्म सञ्चालन हुने प्रयोगात्मक सिकाइको पहिलो समूहमा वडा १ देखि १२ सम्म (असार ३० र ३१ गते), दोश्रो समूहमा वडा १३ देखि २४ (साउन १ र २ गते), तेश्रो समूहमा वडा २५ देखि ३२ सम्म र आन्तरिक लेखा परीक्षण शाखाका अधिकारीहरुलाई (साउन ४ र ५ गने) सहभागी गराइनेछ । यसैगरी चौथो समूह बित्त बिभाग, हनुमान ढोका दरवार संरक्षण कार्यक्रम सहरी योजना आयोग र आयोजनाका अधिकारीहरुलाई (साउन ६ र ७ गते) सहभागी गराइनेछ ।

 

Source- kathmanduonline.gov.np

राहत दिनु नपर्नेलाई हामीले फारम भर्न उत्साहित गरेनौं — वडाध्यक्ष मानन्धर

काठमाडौं । काठमाडौं महानगरका प्रमुख बिद्यासुन्दर शाक्य आज वडा १३ मा गएर राहत वितरण गर्नुभएको छ । त्यस क्रममा संघीय संसद सदस्य जीवनराम श्रेष्ठ, जिल्ला समन्वय समितिका प्रमुख शिवसुन्दर राजवैद्य, प्रदेश सभा सदस्य राजेश शाक्य र वडाध्यक्ष ध्रुवनारायण मानन्धरले पनि राहत बाँड्नु भएको थियो ।

१० हजार २०७ घरधुरी भएको वडाको जनसंख्या ४० हजार ४५६ हो । कालीमाटी तरकारी बजार धेरै भीड हुने ठाउँ हो । राती २ बजेदेखि बजार खुल्छ । बजारमा तरकारी लिन आउने सवारी साधन एकातिर कलंकीसम्म, अर्कोतिर बिष्णुमती पुल र परोपकारसम्म पुग्ने गरेकोले स्थानीयको गुनासो छ । बजार र महामारी नियन्त्रणका बिषयमा कुरा गर्दै वडाध्यक्ष धु्रवनारायण मानन्धर भन्नुहुन्छ — यस अघि किसान बजार र खुद्रा बजार बन्द गर्ने निर्णय भइसकेको छ । तरकारी वितरणका लागि थोक बजार चलिरहेको छ । यसमा पनि भीड गरेर व्यापार गर्न पाइदैन । यो महामारी हो । रोक्न सबैले दायित्व बोध गर्नुपर्छ ।

राहत लिनका लागि वडामा २१ गते साँझसम्ममा ३३२ जनाले निवेदन दिनुभएको थियो । उहाँहरुमध्ये १५ जनाको फारम अस्वीकृत भयो । राहत व्यवस्थापनका विषयमा जानकारी दिँदैन वडासचिव देवी वस्ती ज्ञवालीले भन्नुभयो — आज ३१७ जनालाई नै राहत दिने तयारी थियो । तर कोही फारम बुझाएर पनि सामान लिन आउनु भएन । कसैले नागरिकता नलिइ आउनुभयो । त्यसैले आज राहत लिनेको संख्या करीब २५० पुग्यो ।

वडाले आज छुटेका र फारम लिएर बुझाउन बाँकी हुनेका लागि मंगलबार राहत दिनेछ । फारम लिएर बुझाउन बाँकी हुने तथा फारम लिएर बुझाउन चाहनेका लागि आइतबार र सोमबार समय तोकिएको छ ।

राहत वितरण कार्यमा नेपाली सेना र नेपाल प्रहरीले सामाजिक दुरी कायम गराउन सहयोग गरेका थिए । राहत लिन आउनेलाई हात धोएर स्यानिटाइजर प्रयोग गराइएको थियो । राहत दिँदा हरेकलाई ४ थान सर्जिकल माक्स पनि दिइएको थियो ।

Source - kathmanduonline.gov.np

,

फोहारको सिधा जोखिममा भएकालाई पहिलो प्राथमिकतामा राखेर फोहोर व्यवस्थापनमा काम गर्ने सबैलाई सामाग्री उपलब्ध गराउँछौं — मेयर शाक्य

काठमाडौं । काठमाडौं महानगरका प्रमुख बिद्यासुन्दर शाक्यले फोहोरको प्रत्यक्ष सम्पर्कमा बसेर काम गर्ने कर्मचारीलाई पहिलो प्राथमिकतामा राखेर फोहोर व्यवस्थापनका काम गर्ने सफाइकर्मीहरुलाई व्यक्तिगत सुरक्षात्मक उपकरण उपलब्ध गराउने बताउनुभएको छ । पहिले हामी औषधि छर्ने काममा खटिने, ल्याण्डफिल साइटमा खटिने, अस्पतालजन्य फोहोर संकलनमा खटिने ५० जनालाई दिन्छौं । यसका लागि वातावरण व्यवस्थापन बिभागबाट काम शुरु भइसकेको छ । मेयर शाक्यले थप्दै भन्नुभयो — लकडाउनका समयमा महामारीबाट बच्न सबैै मानिस घरमै बसेका बेला पनि सफाइकर्मीहरु काममै हुनुहुन्छ । उहाँहरुलाई जोगाउनु मेरो जिम्मेवारी हो ।

कोभिडको महामारीका समयमा अत्यावश्यक सेवामा काम गर्नेहरुका लागि सरकारले २५ लाख रुपैयाँको बीमा गरिसकेको छ । मेयर शाक्यले थप्दै भन्नुभयो — सामान्य अवस्थामा पनि र अनौपचारिक क्षेत्रमा काम गर्नेले पनि सुरक्षात्मक उपकरणको प्रयोग गर्नुपर्छ ।

काठमाडौं महानगरपालिका र कीर्तिपुर नगरपालिकासँगको साझेदारीमा गैर—सरकारी संस्था गुथिले ५०० सय सफाइकर्मीका लागि व्यक्तिगत सुरक्षात्मक सामाग्री उपलब्ध गराउने भएको छ । वाटर एड नेपालको सहयोग र फोहरमैला व्यवस्थापन संघ नेपालको सहकार्यमा उपलब्ध हुने सामाग्रीको नमूना गुथिका प्राबिधिक सल्लाहकार प्रकाश अमात्यले महानगरका प्रमुख शाक्यलाई हिजो हस्तान्तरण गर्नुभयो । यो सुरक्षात्मक उपकरणमा सुरक्षा लुगा १ सेट, चस्मा एउटा, पञ्जा एक जोर, बुट एक जोर, मास्क ३ थान, १०० एमएलको स्यानिटाइजर, एउटा साबुन, एउटा रुमाल, एउटा बाल्टिन र एउटा मग हुनेछ ।

सामाग्री हस्तान्तरणपछि प्रतिक्रिया दिँदै गैर—सरकारी संस्था गुथिका प्राविधिक सल्लाहकार प्रकाश अमात्यले — भाइरसको महामारीका समयमा व्यक्तिगत सुरक्षा सामग्री उपलब्ध गराएर सरसफाईकर्मीहरुको पेशालाई सुरक्षित बनाउन प्रयास गरिएको बताउनुभयो । यसले सफाइकर्मीको पेशागत व्यवहार परिवर्तनमा ठूलो सघाउ पु¥याउनेछ । उहाँले परिणामको अपेक्षा गर्नुभयो ।

हस्तान्तरण अवसरमा महानगरका प्रमुख प्रशासकीय अधिकृत राजेश्वर ज्ञवाली, वातावरण व्यवस्थापन बिभागका प्रमुख हरिकुमार श्रेष्ठ र  फोहोरमैला व्यवस्थापन संघका पदाधिकारी पनि सहभागी हुनुहुन्थ्यो । गुथिले हिजो नै कीर्तिपुर नगरलाई पनि सामाग्री हस्तान्तरण गरेको छ ।

काठमाडौं महानगरमा करीब ९५० कर्मचारी सरसफाइमा काम गर्छन् । फोहरमैला व्यवस्थापन संघ नेपालको तथ्याङ्ककाअनुसार काठमाडौ उपत्यकामा ६५ वटा सरसफाई कम्पनी छन् । यी कम्पनीअन्तर्गत करीब २ हजार ५०० सरसफाईकर्मी काम गर्छन् । देशभरिको करीब ६ हजार व्यक्ति सरसफाइमा काम गर्ने अनुमान छ ।

Source - kathmanduonline.gov.np

,

सामूदायिक कुकुर, चौपाया, बाँदर लगायत पशुपंक्षीको आहार वडाको विवेकले व्यवस्था गर्ने

काठमाडौँ । ‘कोरोना भाइरस (कोभिड–१९) सम्वन्धि राहतवितरण मापदण्ड–२०७६’ स्वीकृत गर्दै काठमाडौँ महानगरपालिकाले ४३ औं कार्यपालिका बैठक सम्पन्न गरेको छ । काठमाडौँ महानगरपालिकाका प्रमुख बिद्यासुन्दर शाक्यको अध्यक्षतामा आज राष्ट्रिय सभा गृहमा बसेको बिशेष बैठकले यो मापदण्ड स्वीकृत गरेको हो ।

कोरोना भाइरसको संक्रमणलाई फैलिन नदिन र यसको रोकथाम– नियन्त्रण गर्न सरकारले जारी गरेको लकडाउनबाट अत्यावश्यक सेवा बाहेक सबै बन्द गरेको, मानिसहरुलाई घर बाहिर निस्कन रोक लगाइएको अवस्थामा महामारी नियन्त्रणका कामलाई मानवीय संवेदनामा आधारित बनाउन यसप्रकारको निर्णय गरिएको प्रमुख शाक्यको भनाइ छ । काठमाडौँ महानगरपालिकाभित्र वसोवास गर्दै आएका असहाय, अति विपन्न र दैनिक ज्यालादारी गर्ने व्यक्तिहरु यसबेला खाना, खाजा नपाएर समस्यामा पर्नुभएको छ । यस्ता बर्गको पहिचान गरेर सबैलाई समान प्रकारको राहत उपलब्ध गराउन यस्तो मापदण्ड पारित गरिएको हो, प्रमुख शाक्यको भनाइ छ ।

बैठकले पारित गरेको मापदण्डअनुसार अभिभावक नभएका, आफ्नो आय श्रोत नभएका, अनाथ आश्रम, बृद्धाश्रम, संरक्षण गृह, मन्दिर गुम्बा, मस्जिद जस्ता आश्रम स्थलमा रहेका अरुको सहयोग एवं सहारामा बाँचेका व्यक्तिहरु असहाय हुन् । आम्दानीको कुनै स्थायी श्रोत नभएका, दैनिकी गुजारा गर्न धौधौ भएका र सम्वन्धित वडाले अति विपन्न भनी प्रमाणित गरेका व्यक्ति वा परिवारलाई अति बिपन्न परिवारमा राखिएको छ । त्यसैगरी, संगठित संस्थामा काम गर्नेबाहेक काठमाडौँ महानगरमा विगतदेखि दैनिक रुपमा ज्याला मजदुरी गर्दै आएका काठमाडौँमा घर–जग्गा नभएका भरियालगायतलाई दैनिक ज्यालादारीमा काम गर्ने व्यक्ति भनी मापदण्डले उल्लेख गरेको छ ।

हालै विदेश भ्रमण गरी महानगरपालिकामा बस्दै आएका व्यक्तिहरुको विवरण संकलन गर्ने कामलाई वडाले यस अघि नै थालिसकेको छन् । यसरी गरिने बिववरण संकलन कार्यलाई एकरुपता दिन बैठकले ढाँचा उपलब्ध गराएको छ । ‘महानगरले गर्ने कामसँगै काठमाडौं उपत्यकामा भएका कामलाई एउटै मापदण्ड तथा समान महत्वका साथ अघि बढाउन जरुरी छ ।,’ प्रमुख शाक्यले भन्नुभयो, — ‘अहिले मानव स्वास्थ्यको सुरक्षालाई पहिलो प्राथमिकतामा राखेर बाँकी कामलाई क्रमशः सम्पादन गर्दै जानु पर्ने बेला आएको छ । यो जनप्रतिनिधिको नेतृत्व क्षमता देखाउने बेला पनि हो ।’

‘लकडाउनपछि अहिले खाद्यान्न, ग्याँसलगायतका सामाग्रीको अभाव हुने हो कि भन्ने धेरैमा आशंका उत्पन्न भएको छ,’ प्रमुख शाक्यले भन्नुभयो, ‘आजको बैठकले यस्तो समस्यालाई समेत हल गर्न र भीडभाड कम गराउन सुरक्षाकर्मी, जनप्रतिनिधिलगायतको सहयोगमा घर–घरमा खाद्यान्न पु¥याउने, आपूर्ति ब्यवस्थालाई सहज बनाउन सम्वन्धित निकायसँग छलफल गरी अघि बढ्ने पनि बैठकले निर्णय गरेको छ ।’

बैठकले पशुपंक्षी, चराचुरुङ्गीलगायतको बाँच्न पाउने अधिकार सुनिश्चित गर्नका लागि वडामा पठाइएको रकमबाट खर्च गर्ने गरी उनीहरुलाई आहाराको व्यवस्था गर्ने निर्णय गरेको छ ।’ प्रमुख शाक्यले भन्नुभयो, ‘राहत वितरणलगायतका लागि ठूला वडालाई चार, मझौला वडालाई तीन र साना वडालाई थप निकासा दिएका छौँ । आवश्यक प¥यो भने पुनः थप गर्ने निर्णय भएको छ ।’

बैठकले ५ सय जनासम्मलाई राख्न मिल्ने ‘क्वारेन्टाइन’को व्यवस्थापनका लागि ठाउँ खोजी गर्ने निर्णय गरेको छ । कोरोनाको संक्रमणमाथि निगरानी बढाउन हिजो सार्वजनिक गरिएको प्रबिधिमा आधारित प्रणालीलाई प्रभावकारी बनाउने बैठकले गरेको अर्को निर्णय हो ।
कार्यपालिका बैठकमा अहिलेको परिस्थितिमा वडा कार्यालयले सामना गर्नुपरिरहेका समस्याका बारेमा कार्यपालिका सदस्यहरुले अनुभव बाँड्नु भएको थियो । बैङ्कि क्षेत्र बन्द भएपछि पैसा भए पनि खाद्यान्न नपाएको, धारामा नियमित पानी पठाउन नसकिएको, ग्याँस तिवरण प्रणाली नियमन गर्ने संयन्त्र आवश्यक भएको, भित्री सहरी क्षेत्रमा चहलपहल कम गराउन थप कडाइ गर्नुपर्ने सुझाव आएका थिए । बैठकमा वडा ३ का अध्यक्ष दीपक के. सी. ४ का अध्यक्ष मोहन विष्ट, ७ का अध्यक्ष शुद्धकुमार डंगोल, ११ का अध्यक्ष हीरालाल तण्डुकार, १३ का अध्यक्ष धु्रबनारायण मानन्धर, १६ का अध्यक्ष मुकुन्द रिजाल, १८ का अध्यक्ष न्हुच्छेकाजी महर्जन, २५ का अध्यक्ष नीलकाजी शाक्य र कार्यपालिका सदस्य मनोज लामाले धारणा राख्नुभएको थियो ।

यस क्रममा नियमित डाइलोसिस गराउनु पर्ने मृगौलाका बिरामीले नियमित डाइलोसिस गर्न नपाएर समस्या हुन थालेको, खाद्यान्न पसल सञ्चालन गर्ने बिषयमा स्थानीय प्रशासन र जनप्रतिनिधिले गर्न खोजेको काममा समन्वय नभएको जस्ता बिषयमा अवगत गराउँदै यस्ता क्षेत्रका काममा पनि एकरुपता कायम गराउन प्रयत्न गर्नुपर्नेमा जोड दिनुभएको थियो ।

कार्यपालिका सदस्यबाट प्राप्त सुझाव र सुधारको अपेक्षालाई सम्बोेधन गर्दै मेयर शाक्यले जटिल परिस्थितिको सामना गर्दा साना समस्यालाई धेरै महत्व नदिन र सामुहिक हितमा ध्यान दिन आग्रह गर्नुभयो । बैठकमा उपप्रमुख हरिप्रभा खड्गी श्रेष्ठ र निमित्त प्रमुख प्रशासकीय अधिकृत राजेश्वर ज्ञवाली सहित कार्यपालिका सदस्यहरु सहभागी हुनुभएको थियो ।

Source - kathmanduonline.gov.np

अनुदानलाई ३ प्रकारमा बिभाजन, सहायता र अनुदान छुट्टै

फागनु १

काठमाडौं । महानगरबाट वितरण हुने अनुदान रकम व्यवस्थापन सम्बन्धि निर्देशिकालाई संशोधनसहित स्वीकृत गर्दै काठमाडौंं महानगरको ४१ औं कार्यपालिका बैठक सम्पन्न भएको छ । बिहीबार महानगरको सभा कक्षमा प्रमुख तथा कार्यपालिकाका अध्यक्ष बिद्यासुन्दर शाक्यको अध्यक्षतामा सम्पन्न बैठकमा बिधायन समितिकातर्फबाट प्रशासन बिभागका प्रमुख नमराज ढकालले निर्देशिका पेश गर्नुभएको थियो । पेश भएको निर्देशिकामाथि दफावार छलफल गरेपछि त्यसमा कार्यपालिका सदस्यबाट प्राप्त भएको सुझाव थप गर्ने गरी निर्देशिका स्वीकृत गरिएको अध्यक्ष शाक्यले जानकारी दिनुभयो ।

निर्देशिकामा ‘संघ वा प्रदेश सरकारबाट प्राप्त भएको अनुदान’, महानगरको आफ्नै श्रोतबाट वितरण हुने ‘अनुदान सहयोग’ र ‘कार्यक्रम सहयोग’ गरी ३ प्रकारका अनुदानको व्यवस्था गरिएको छ । यसअनुसार संघ वा प्रदेश सरकारबाट प्राप्त अनुदान बितरण सम्बन्धि बिधि र मापदण्ड पहिलो प्रकारमा राखिएको छ ।

निर्देशिकाअनुसार महानगरको आन्तरिक श्रोतबाट बितरण हुने अनुदानमध्ये पूर्वाधार विकासका लागि ‘अनुदान सहयोग’ शीर्षकमा वितरण हुनेछ भने क्षमता विकास, सामाजिक तथा परम्परागत गतिबिधि सञ्चालनका लागि दिइने अनुदान रकम ‘कार्यक्रम अनुदान’ शीर्षकबाट वितरण हुनेछ । निर्देशिकामा अनुदान लिने सरकारी निकाय तथा गैरसरकारी संघ संस्था र समुदायले अनुदान लिन पूरा गर्नु पर्ने प्रक्रिया, अनुदानबाट गरिने कामको प्रगति प्रतिवेदन, सामाजिक परीक्षणको व्यवस्थालगायतका प्रवन्ध गरिएको छ ।

त्यस्तै अनुदानका सीमा र क्षेत्रको व्यवस्था पनि गरिएको छ । संरक्षण, पर्यटन, आयमुलक, रोजगारीमुलक, बिपद्, वातावरणीय सुधार, बाल अधिकार, बाल शिक्षा, सूचना तथा जागरण, खेलकुदलगायतका क्षेत्रलाई अनुदान दिइने क्षेत्रका रुपमा समेटिएका छन् । बिपन्नता अनुदानलाई ‘असहाय अनुदान’ र ‘बिपद्मा परेकालाई दिइने अनुदान’ गरी २ प्रकारमा बाँडिएको छ । निर्देशिकाले ‘उपचार सहायता’को पनि व्यवस्था गरेको छ । निर्देशिकामा अनुदान लिनेले बुझाउनु पर्ने कागजात र कार्यक्रम सञ्चालन गर्दा अपनाउनु पर्ने बिधि तथा कार्यक्रम सकिएपछि पेश गर्नु पर्ने प्रगति तथा प्रगति परीक्षणका बिधिहरु उल्लेख छन् । त्यस्तै कागजातका सूची तथा सम्झौताका ढाँचालाई अनुसूचीमा समेटिएको छ ।

बैठकले महानगरमा कार्यरत १०६ जना करारका कर्मचारीको ६ महिना म्याद थप गरेको छ । यसै गरी वडा नं. ६ मा निर्माण भएको राधाकृष्ण मन्दिरको नक्सा पास दस्तुर छुट दिने निर्णय गरेको छ । कार्यकाल बाँकी रहँदै हृदयाघातका कारण मृत्यु भएका वडा ८ का तत्कालीन सचिव ओमप्रकाश पौडेलले सेवा अवधि थप गरेर परिवारलाई निवृत्तिभरण उपलब्ध गराउनेलगायतका निर्णय गर्दै कार्यपालिका बैठक सकिएको थियो ।

Source- kathmanduonline.gov.np

,

सहरलाई रातमा पनि जागा बनाउँदै लैजान र यातायात प्रणालीलाई बिस्तार गर्दै लैजान आवश्यक छ — मेयर शाक्य

फागनु १

काठमाडौं ।सहरलाई जागा बनाउँदै लाने क्रममा २०७७ को नयाँ बर्षसँगै काठमाडौंमा रात्रीकालीन सार्वजनिक सवारी साधन सञ्चालन तयारीलाई तीब्र बनाउन महानगरका प्रमुख बिद्यासुन्दर शाक्यले सरोकारवाला निकायका अधिकारीहरुलाई आग्रह गर्नुभएको छ । बुधबार महानगरको सभा कक्षमा आयोजना गरिएको ‘काठमाडौं उपत्यकामा रात्रीकालीन सार्वजनिक यातायात र ट््याक्सी सेवा सञ्चालन’ बिषयमा सरोकारवाला कार्यालयसँगको बैठकमा बोल्दै मेयर शाक्यले भन्नुभयो — ‘यो सजिलो काम होइन । २०६९ सालमा पनि प्रयोग गरिएको हो । अहिले समय र समाज फेरिएको छ । सहरलाई रातमा पनि जागा बनाउँदै लैजान र यातायात प्रणालीलाई बिस्तार गर्दै लैजान आवश्यक छ । रात्रीकालीन सवारी सञ्चालनका लागि महानगरले केही सहयोग गर्छ, त्यसमा थपेर व्यवसायीलाई सेवा बढाउन प्रेरित गर्नुपर्छ ।’ मेयर शाक्यको भनाइ थियो । सेवा शुरु गर्दा पहिलो चरणमा बेलुका ८ बजेदेखि ११ बजेसम्म सवारी सञ्चालन गर्ने बिषयमा बैठक केन्द्रीत थियो ।

हामीले यस अघि नमूनाका रुपमा डुँडिखेल वरिपरि ‘पिक एण्ड ड्रप’ शुुरु गरिसकेका छौं । शुरुमा केही आलोचना भए पनि अहिले त्यसको प्रभाव सकारात्मक परेको छ,’ मेयर शाक्यले भन्नुभयो, ‘सार्वजनिक यातायातले यात्रु पर्खिने होइन, यात्रुले चाहिँ पर्खेर सवारी चढ्न यात्रुलाई अभ्यस्त गराउँदै लैजानु पर्छ । पहिलेको १८ महिना रात्री सेवा सञ्चालनको अनुभव छ । त्यसको सिकाइलाई उपयोग गरेर दिगो सेवा व्यवस्थापनको काम गरौं ।’ बैठकमा यातायात व्यवस्था बिभागका महानिर्देशक गोगनबहादुर हमालले, साँझ वा त्यसपछिको समयमा मानिसहरु बाहिर निस्कने वातावरण तयार गर्दै सवारी सञ्चालनलाई यससँग जोड्नु पर्ने बताउनुभयो । ‘प्रस्ताव सकारात्मक छ,’ उहाँले भन्नुभयो, ‘रात्रीकालीन सेवा सञ्चालन गर्नुको विकल्प छैन । यसलाई छिटै कार्यान्वयन गर्ने गरी अघि बढौँ ।’ बैठकमा काठमाडौँ जिल्ला प्रशासन कार्यालयका सहायक प्रमुख जिल्ला अधिकारी जीवनप्रसाद आचार्यले, जिल्ला प्रशासन कार्यालयले सबन्वयको काम गर्ने बताउँदै सकारात्मक योजनालाई चाँडै अघि बढाउनु पर्ने बताउनुभयो ।

काठमाडौंका मानिसहरु चाँडै घर फर्कन्छन् । यहाँको सामाजिक परिवेश नै त्यस्तै छ । बैठकमा बोल्दै काठमाडौं महानगरको सहरी योजना आयोगका उपाध्यक्ष सरोज बस्नेतले — रात्रीकालीन बजार चलाउँदै जाने, सडकमा पर्याप्त प्रकाशको व्यवस्था गरिदिने कामलाई पनि सँगै लैजाने योजना अघि बढाउनुपर्ने सुझाव दिनुभयो । रातको समयमा सबै ठाउँमा यात्रुको समान चाप हुँदैन, महानगरका सहसचिव राजेश्वर ज्ञवालीले कोरियामा यस प्रकारको कार्यक्रम कार्यान्वयन गर्दा टेलिकम्युनिकेसनबाट कुन ठाउँमा यात्रुको कस्तो खालको चाप छ, अध्ययन गरेर रुट निर्धारण गरिएको अभ्यास काठमाडौंको सन्दर्भमा पनि उपयुक्त हुन सक्ने बताउनुभयो । महानगरीय ट्राफिक महाशाखा रामशाहपथका प्रहरी उपरीक्षक राजकुमार बैदवारले रात्रीकालीन व्यवसायलाई प्रबर्धन र सहरी सेवालाई थप प्रभावकारी बनाउन सेवा सञ्चालन गर्नुको विकल्प नभएको बताउनुभयो । रात्रीकालीन यातायातले नेपाल भ्रमण वर्षमा नेपाल आउने पर्यटकका लागि पनि सहयोग पुग्छ । महानगरीय प्रहरी कार्यालय रानीपोखरीका प्रहरी उपरीक्षक विमल बस्नेतले भन्नुभयो — यसले स्थानीयमा पनि घुम्ने संस्कार बसाउन मद्दत गर्छ ।

बिगतमा अभ्यास गरियो । अबको थालनी चाहिँ दिगो हुने गरी गर्नुपर्छ । बैठकमा नेपाल राष्ट्रिय यातायात व्यवसायी महासंघ बागमती प्रदेशका अध्यक्ष धर्मराज रिमालले भन्नुभयो — अनुदान दिएरभन्दा भाडा दरमा वृद्धि गरेर सेवालाई दिगो बनाउन सकिने बताउनुभयो । शुरुवात्मा हामी कम्तीमा १५ वटा रुटमा ६० वटा सवारी साधनबाट सेवा सञ्चालन गर्न सक्छौं । यसका लागि सरकारले रात्रीकालीन सेवामा ५० प्रतिशत भाडा वृद्धि गरिदिनुपर्छ । रिमालको माग थियो ।

बैठकले रात्रीकालीन यातायात सेवा सञ्चालन तथा व्यवस्थापन गर्न महानगरको सहरी शुशासन बिभागका प्रमुख हरिबहादुर कुँवरको संयोजकत्वमा सरोकारवाला कार्यालयका प्रतिनिधि रहने कार्यदल पनि गठन गरेको छ । यसको सदस्यमा महानगरीय ट्राफिक प्रहरी कार्यालय, महानगरीय प्रहरी कार्यालय, यातायात व्यवस्था बिभागलगायत कार्यालय र नेपाल राष्ट्रिय यातायात व्यवसायी महासंघलगायत संघ संगठनका प्रतिनिधिलाई सदस्य राखिएको छ ।

Source- kathmanduonline.gov.np

काठमाडौंमा करीब ७० भन्दा बढी ठूला होर्डिङ् बोर्ड

पुष ११

काठमाडौं । बाह्य बिज्ञापनका लागि सहरका राखिएका होर्डिङ् बोर्ड, भित्तामा टाँसिएका पर्चा पम्प्लेट, भित्तेलेखनलगायत सहरी दृश्य प्रदुषण हुने प्रचार सामाग्री हटाउने कामलाई महानगरले तीब्रता दिएको छ । यसै क्रममा शुक्रबार बबरमहल, तीनकुने र कालीमाटी क्षेत्रका ठूला बोर्ड हटाइएको नगर प्रहरी महाशाखा प्रमुख नगर प्रहरी नायब उपरीक्षक धनपति सापकोटाले जानकारी दिनुभयो । काठमाडौं धार्मिक, सांस्कृतिक र पर्यटकीय सहर हो । यसको मौलिकता बचाउनु महानगरको जिम्मेवारी हो । हामी बिगतदेखि नै यस प्रकारका बोर्डको नियमन गर्दै थियौं, उहाँले थप्दै भन्नुभयो — नेपाल पर्यटन बर्ष २०२० लाई लक्षित गरेर अहिले नियमन कार्यलाई तीब्र बनाएका हौं । महानगरले २०७० सालमा जारी गरेको बिज्ञापन सामाग्री नियमन गर्ने कार्यबिधिलाई पूर्ण कार्यान्वयन गर्ने हाम्रो अभियान हो, सापकोटाले सहरी सौन्दर्यीकरणमा महानगरले गरिरहेको कामका बारेमा जानकारी दिँदै भन्नुभयो — भित्तेलेखन, पोल र भित्तामा टाँसिएका पर्चा पम्प्लेट, व्यानरलगायत सहरलाई कुरुप बनाउने सबै सामाग्री हटाउँदैछौं ।

पुष १० बिहीबार गृहमन्त्री रामबहादुर थापाको उपस्थितिमा सरोकारवाला निकायका अधिकारीबीच सहरी सुन्दरता कायम गर्ने काममा सघाउ पु¥याउन सबै पक्षलाई आग्रह गरिएको थियो । यसप्रकारका प्रचार सामाग्रीसँगै अव्यवस्थित रुपमा राखिएका टेलिफोन, केवल तथा इन्टरनेट सेवा प्रदायकका तार हटाउन सार्वजनिक सूचना जारी गर्ने बैठकले निर्णय गरेको छ । तोकिएको समयभित्र तार नहटाए सरकार आफैंले तार हटाउनेछ ।

बैठकमा गृहमन्त्री थापाले भन्नुभयो — सर्वोच्च अदालतले यस प्रकारका प्रदुषण हटाउन यस अघि नै आदेश दिइसकेको छ । अहिले हामी पर्यटन बर्षको संघारमा छौं । सहरलाई सुन्दर बनाउन र कुरुपताबाट बचाउन अब ढिलाई गर्नुहुँदैन । त्यस अवसरमा महानगरका प्रमुख बिद्यासुन्दर शाक्यले — महानगरले सहरी सुन्दरता कायम गर्ने कामलाई नियमित गरेको जानकारी दिँदै यसलाई तीब्र बनाइने बताउनुभएको थियो ।

सहरलाई सुन्दर बनाउन होर्डिङ् बोर्ड मात्र व्यवस्थापन गरेर पुग्दैन, भित्तेलेखन, पर्चा, पोष्टर, पम्प्लेट सबै हटाउनु पर्छ, सहरी दृश्य प्रदुषण हटाउन परामादेशको माग गर्दै सर्वोच्च जानुभएका अधिवक्ता पदमबहादुर श्रेष्ठ भन्नुहुन्छ — महानगरको रेकर्ड भएका प्रचार सामाग्रीलाई बिधिअनुसार व्यवस्थापन गर्नुपर्छ, अभिलेखमा नआएका बिजुलीको पोल, भित्ता तथा अन्य सार्वजनिक ठाउँ वा सार्वजनिक ठाउँबाट देखिने ठाउँका सबै प्रकारका प्रचार सामाग्री हटाउनुपर्छ ।

source-kathmanduonline.gov.np

, ,

काठमाडौं । सम्मान, सांस्कृतिक कार्यक्रम, स्थानीय उत्पादन र मौलिक खानाको प्रदर्शनसँगै महानगरले २५ औं बार्षिकोत्सवका कार्यक्रम सम्पन्न गरेको छ । मंसिर २८ र २९ गते गरी दुई दिन मनाइएको कार्यक्रममा पैदल तथा साइकल यात्राको प्रबर्धनका लागि साइकल ¥याली, दमकल बिस्तार गरी वडा ६ बाट सेवा शुभारम्भ, उत्कृष्ट व्यक्तिगत करदाता सम्मान, परम्परागत नाच तथा बाद्य गुरु सम्मान, शुशासन पत्रकारिता पुरस्कार वितरणलगायत कार्यक्रम सम्पन्न गरिए । समारोहमा मन्त्री त्रिपाठी, सहरी बिकास राज्यमन्त्री रामबीर मानन्धर, महानगरका प्रमुख र उपप्रमुखसहित अधिकारीहरुले ज्यापु समुदायका परम्परागत ६३ गुथि, खड्गी समुदायका ६० गुथि, गुँला बाजाका २३ वटा समूहका बाजा गुरुहरुलाई नगद सहित सम्मान गर्नुभएको हो । त्यसैगरी मखं त्वाकी श्री ३ कुमारी प्रकृति महर्जन र किलाघः त्वाः की कुमारी रेसुका महर्जनलाई मासिक १५ हजार रुपैयाँ भत्तासहित सम्मान गर्नुभयो । त्यस्तै इन्द्रजात्राका अवसरमा निकालिने पुलुकिसि, दीप्याखं, लाखे, आकाश भैरव (सवःद्यः) र श्री करुणामय पँय्ताः बाजाका बाजा गुरुहरूलाई सम्मान गरिएको थियो ।

आइतबार बसन्तपुरमा आयोजना गरिएको मुल समारोहमा बोल्दै संघीय मामिला तथा सामान्य प्रशासन मन्त्री हृदयेश त्रिपाठीले — काठमाडौंको गरिमा बचाउनका लागि मात्र नभइ संघीयताको जग बलियो बनाउन पनि महानगरका उदाहरणीय हुनुपर्ने बताउनुभयो । काठमाडौंको बिरासत ठूलो छ । यो राजनीति र प्रशासनिक व्यवस्था परिवर्तनको साक्षी पनि हो । सबै मिलेर यसको गरिमा बचाउनुपर्छ, मन्त्री त्रिपाठीको भनाइ थियो । कार्यक्रममा बोल्दै संघीय संसद सदस्य जीवनराम श्रेष्ठले — महानगरको बिकास र समृद्धिका लागि राम्रा कामको प्रशंशा र सुधार गर्नु पर्ने कामका लागि रचनात्मक सुझाव दिनुपर्ने धारणा राख्नुभयो । त्यस्तै प्रदेश सभा सदस्य नारायण सिलवालले प्राप्त उपलब्धीलाई जोगाएर थप कार्यक्रम अघि बढाउनु पर्ने बताउनुभयो ।

कार्यक्रमलाई सम्बोधन गर्दै महानगरका प्रमुख बिद्यासुन्दर शाक्यले — महानगरको गौरव र महानगरबासीका चाहना पूरा गर्न आफू प्रतिवद्ध रहेको बताउनुभयो । यसका लागि जस्तासुकै चुनौतीको पनि सामना गर्न तयार रहेको मेयर शाक्यको भनाइ थियो । उहाँले काठमाडौंलाई सहयोगापेक्षी मानवमुक्त बनाउन थालिएको अभियान र बौद्धमा सञ्चालन गरिएको दमकल भवनलाई महत्वपूर्ण उपलब्धीका रुपमा प्रस्तुत गर्नुभयो । महानगरभित्रका परम्परागत बाद्य तथा नाच गुरुहरुलाई सम्मान गरेका छौं । हामी मूर्त अमूर्त सांस्कृतिक सम्पदालाई जोगाउने कुरालाई प्राथमिकता दिन्छौं, मेयर शाक्यको भनाइ थियो ।

कार्यक्रममा टोलमा रहेका जीवित देवी कुमारीमध्ये मरु लाई जनही मासिक १५ हजार रुपैयाँसहित सम्मान गरिएको थियो । त्यस्तै ८ जना पत्रकारलाई व्यक्तिगत र २ वटा सञ्चार माध्यमलाई संस्थागत रुपमा शुशासन पत्रकारिता पुरस्कार प्रदान गरिएको थियो । व्यक्तिगततर्फ पुरस्कार प्राप्त गर्नेमा नेपाल समाचार पत्रका ईश्वरराज ढकाल, नागरिक दैनिकका हिमाल लम्साल, नयाँ पत्रिकाका तीर्थ बस्नेत, राष्ट्रिय समाचार समितिका शर्मिला पाठक, राजधानी दैनिकका केशव पाण्डे, झीँगु डट कमका रेखा शाक्य र लहना बाः पौ साप्ताहिकका नृपेन्द्र श्रेष्ठ हुनुहुन्छ । त्यस्तै संस्थागततर्फ नेवा अनलाइन र गोरखापत्र दैनिकलाई पुरस्कार प्रदान गरियो । उहाँहरुलाई सम्मान पत्रसहित जनही ५० हजार राशीको चेक उपलब्ध गराइएको थियो । पुरस्कार प्रदान गर्न महानगर सञ्चार तथा जनसम्पर्क सल्लाहकार राजेन्द्र स्थापितको संयोजकत्वमा ३ सदस्यीय उपसमिति गठन गरेको थियो । उपसमितिको सदस्यमा सहायक बिज्ञ मणिराज बास्तोला ‘मोहन’ हुनुहुन्थ्यो भने सदस्य प्रशासन बिभागका प्रमुख नमराज ढकाल सदस्य सचिव हुनुहुन्थ्यो ।

उत्कृष्ट करदातामा सम्पत्ति करतर्फ वडा ६ का छेतेन ग्युर्मान श्रेष्ठलाई सम्मानित गरियो । उहाँले ४ लाख ६४ हजार ३८४ रुपैयाँ कर तिर्नुभएको थियो । त्यस्तै बहाल करतर्फ वडा ११ की जया राज्य लक्ष्मी शाहलाई सम्मान गरियो भने व्यवसाय करतर्फ वडा ५ मा रहेको उपमा डेभलपर्स प्रा. लि. लाई सम्मानित गरियो । शाहले २४ लाख बहाल कर तिनुभएको थियो भने प्रा. लि. ले ५० हजार व्यवसाय कर तिरेको थियो । मनोरञ्जन करतर्फ वडा ३० मा रहेको कुमारी चलचित्र मन्दिरलाई सम्मान गरियो । चलचित्र मन्दिरले १५ लाख ७० हजार ७६३ रुपैयाँ मनोरञ्जन कर तिरेको थियो । यो रकम गएको आर्थिक बर्षृमा भएको कारोबारका आधारमा लिइएको हो । यससँगै बिद्यालयस्तरीय निबन्ध र कविता प्रतियोगिताका बिजेतालाई नगद सहित सम्मान प्रदान गरिएको थियो । दिवसका अवसरमा आधारभूत तह (कक्षा १ देखि ८ सम्म) स्तरीय ‘मेरो काठमाडौं, म बनाउँछु’ विषयमा निबन्ध प्रतियोगिता र माध्यमिक तह (कक्षा ९ र १०) स्तरीय ‘सांस्कृतिक शहर, काठमाडौं नगर’ विषयमा कविता प्रतियोगिता आयोजना भएको थियो । त्यस्तै कर्मचारी र जनप्रतिनिधिबीच सम्पन्न डोरी तान, कुर्सी दौड, घैंटो फोड्ने प्रतियोगिताका बिजेतालाई पनि नगदसहित सम्मान गरिएको थियो ।

यससँगै महानगरमा २५ बर्ष नियमित सेवा गर्ने १७ जना कर्मचारीलाई दीर्घ सेवा पदक प्रदान गरियो । यसरी पदक प्राप्त गर्ने कर्मचारीहरुमा निर्देशक कमलबाबु श्रेष्ठ, निर्देशक रबिन्द्र कुमार राई, उपनिर्देशक रामबाबु महतो, उपनिर्देशक निर्मल बराल, उपनिर्देशक मनोज सिंह सुवाल, उपनिर्देशक गम्भीरलाल श्रेष्ठ, ईञ्जिनियर बीरबहादुर कार्की, इञ्जिनियर माधव श्रेष्ठ, अमिन उत्तमप्रसाद भट्टराई, नायव सुब्बा कृष्ण गोपाल प्रधान हुनुहुन्छ । त्यस्तै कार्यालय सहयोगी राजु खत्री, मेतर अञ्जु नेपाली, कुचीकार सानुकान्छी पोडेनी, कुचीकार कुचीकार मीना कुचीकार, कुचीकार शान्ता पोडेनी, कुचीकार बुद्धलक्ष्मी पोडेनी र कुचीकार सुर्जमाया पोडेनी हुनुहुन्छ ।

मुल कार्यक्रमपछि व्यवस्थापन उपसमितिले बसन्तपुरमा मौलिक सांस्कृतिक कार्यक्रम आयोजना गरिएको थियो ।

दिवसलाई व्यवस्थित गर्न वडा १८ का अध्यक्ष एवं सम्पदा तथा पर्यटन समितिका संयोजक न्हुच्छेकाजी महर्जनको संयोजकत्वमा व्यवस्थापन उपसमिति, वडा ३२ का अध्यक्ष एवं सुशासन समितिका संयोजक नवराज पराजुलीको संयोजकत्वमा कर्मचारी, करदाता सम्मान तथा पुरस्कार उपसमिति, वडा १५ का अध्यक्ष एवं प्रवक्ता ईश्वरमान डंगोलको संयोजकत्वमा प्रचारप्रसार उपसमिति, वडा १६ का अध्यक्ष मुकुन्द रिजालको संयोजकत्वमा कविता, निबन्ध तथा खेलकुद उपसमिति गठन गरिएको थियो ।

२०५२ साल मंसिर २९ गते तत्कालीन काठमाडौं नगरपालिकालाई महानगरपालिका घोषणा गरिएको थियो । महानगर घोषणा भएको यस वर्ष २५ वर्ष पुगेको हो ।

आगमछेँ पुननिर्माण, फोहोर व्यवस्थापन, नेपाल पर्यटन बर्ष २०२० र इन्द्रजात्राको गरिमा कुराकानीका मुख्य बिषय

चन्द्रमणि भट्टराई
असोज १

काठमाडौं । नेपालका लागि जापानको राजदूत मासामिचि साइगोले बुधबार काठमाडौं महानगरका प्रमुख बिद्यासुन्दर शाक्यसँग शिष्टाचार भेट गर्नुभएको छ । राष्ट्रिय सभा गृहको बिशिष्ट कक्षमा उहाँहरुबीच करीब आधा घण्टा कुराकानी भएको थियो ।

कुराकानीका क्रममा मेयर शाक्यले — जापान र नेपाल दुई देशसँगै जापान र नेपालका नगर—नगरबीचको सम्बन्धमा असर हुने कुनै पनि काम कसैबाट नहुने बताउनु भयो । राजदूत साइगोले — जापान सरकारको सहयोगमा बसन्तपुरमा निर्माणाधीन अबस्थामा रहेको आगमछेँ पुननिर्माणका बिषयमा फरक—फरक ठाउँबाट फरक—फरक कुरा आएपछि आफू अन्यौलमा रहेको बताएपछि मेयर शाक्यले आपसी सम्बन्धको कुरा उठाउनुभएको हो । आगमछेँसँग सम्ब्न्धि राख्ने पक्ष धेरै हुनुहुन्छ, त्यो सत्य हो । उहाँहरु सबैलाई समन्वय गर्ने काम महानगरले गर्नेछ, मेयर शाक्यले राजदूत साइगोलाई आश्वस्त पार्नुभयो । आगमछेँ पुननिर्माणका सम्बन्धमा प्राबिधिक समूहले काम गरिरहेको छ । उहाँहरुको सुझाव प्राप्त भएसँगै आपसी समन्वय गरेर, आफ्नो पदावधि सकिनु अघि नै आगमछेँको पुननिर्माण पूरा गर्ने मेयर शाक्यको भनाइ थियो ।

भेटका क्रममा राजदूत साइगोले — आगमछेँसहित काठमाडौंमा भएका सांस्कृतिक मूर्त अमुर्त सम्पदाबाट आफू प्रोत्साहित रहेको बताउनुभयो । इन्द्रजात्राको प्रसङ्ग उल्लेख गर्दै उहाँले भन्नुभयो — कुमारी रथ यात्रा गर्दा रथबाट फूल फाल्ने रहेछन् । यसरी फालिएको एउटा फूल मैले पनि भेटेको छु । फूल अलि ओइलाएको छ तर त्यसलाई जोगाएर राखेको छु । त्यसै प्रसङ्गमा उहाँले भन्नुभयो — जात्रा अवलोकन गर्न हाम्रो देशको मात्सुमोतो नगरबाट प्रतिनिधि मण्डल आएको थियो । अब नेपाल पर्यटन बर्षमा पनि जापानीजहरुलाई नेपाल आउन सहजीकरण गर्छौं ।

भेटका क्रममा राजदूत साइगोले — जापानको वातावरण मन्त्रालयले आयोजना गर्ने फोहोर व्यबस्थापन सम्बन्धि प्राबिधिक कार्यक्रममा निम्तो दिनुभयो । यसरी निम्तो दिँदै उहाँले थप्नुभयो — काठमाडौंको फोहोर व्यवस्थापनमा प्रबिधिको प्रयोग गर्न हामी इच्छुक छौं । राजदूतको यस्तो प्रस्ताव सुनेपछि मेयर शाक्यले भन्नुभयो — यस अघिका भेटमा पनि मैले भनेको छु । फोहोर व्यवस्थापनमा लगानी व्यवस्थापन गर्ने काम अहिले लगानी बोर्डले गरिरहेको छ । त्यहाँबाट टुङ्गो आएपछि हामी सहकार्य गर्न सक्छौं कि सक्दैनौं बल्ल भन्नु सकिन्छ । अहिले भन्न सक्ने अवस्था छैन ।

भेटका क्रममा कार्यपालिका सदस्यहरु तथा अन्तरराष्ट्रिय सम्बन्ध सचिवालयका अधिकारीहरु सहभागी हुनुहुन्थ्यो ।

७ करोड लागतमा तयार हुने भवन १८ महिनामा निर्माण सम्पन्न गरिने

जेठ ६

काठमाडौं । महानगरको वडा २९ मा बीर गणेशमान सिंह जेष्ठ नागरिक भवनको शिलान्यास भएको छ । सोमबार बिहान आयोजना गरिएको कार्यक्रममा संघीय संसद सदस्य प्रकाशमान सिंह र महानगरका प्रमुख बिद्यासुन्दर शाक्यले संयुक्त रुपमा भवनको शिलान्यास गर्नुभएको हो । भवन निर्माणका लागि क्षेत्र नं. १ का संसद प्रकाशमान सिंहले संसद कोषबाट ५० लाख उपलब्ध गराउनु भएको छ भने महानगरले वडालाई पठाएको रकमबाट ठूला आयोजनामा खर्च हुने रकमबाट ५० लाख रुपैयाँ उपलब्ध गराइने भएको छ । यससँगै प्रदेश सभा सदस्य दिपेन्द्र श्रेष्ठ र गणेश दुलालले भवन निर्माणका लागि थप रकम प्रदेशबाट उपलब्ध गराउने प्रतिवद्धता व्यक्त गर्नुभएको छ ।

कार्यक्रममा बोल्दै संसद सदस्य प्रकाशमान सिंहले — भवन निर्माण कार्य समयमा नै सम्पन्न गरेर सरकारले तोकेको समयमा काम गर्छ भन्ने सन्देश दिन जरुरी रहेको उल्लेख गर्नुभयो । संसद बिकास कोषका बिषयमा उठेका चर्चाप्रति संकेत गर्दै उहाँले भन्नुभयो — संसदले पाउने पैसा गोजीमा आउने पनि होइन, जहाँ मन लाग्यो त्यहाँ खर्च गर्न पनि पाइँदैन । त्यसैले यसको आलोचना गर्नुपर्दैन ।

शिलान्यासपछि धारणा राख्ने क्रममा महानगरका प्रमुख बिद्यासुन्दर शाक्यले, बिकास गर्न श्रोतको कमी नहुने उल्लेख गर्नुभयो । धेरै व्यक्तिलाई लाभ पुग्ने योजनामा सबै मिलेर काम गर्ने हो भने, परिवर्तन देखाउन समय लाग्दैन । भ्रम फैलाउने प्रवृत्तिले हुने काम पनि नहुने अबस्थामा पुगेको छ । हामी वृद्धाश्रम बनाउँदैनौं । बाबुआमाको रेखदेख सन्तानले गर्नुपर्छ, मेयर शाक्यले थप्दै भन्नुभयो — हामी हरेक वडामा एक÷एक वटा जेष्ठ नागरिक मनोरञ्जन केन्द्र खोल्ने नीतिमा छौं । आउनुहोस्, मिलेर काम गरौं ।

त्यसै क्रममा प्रदेश सभा सदस्य गणेश दुलाल र दिपेन्द्र श्रेष्ठले स्थानीय पूर्वाधार र सामाजिक बिकासका काममा प्रदेशबाट उपलब्ध हुने श्रोत उपलब्ध गराउने प्रतिबद्धता जनाउनुभयो । त्यस्तै महानगरकी उपप्रमुख हरिप्रभा श्रेष्ठ खड्गीले — नागरिक सहभागिताबिना दिगो बिकास सम्भब नभएको उल्लेख गर्नुभयो । एकातिर काम गर्दै जाने, अर्कोतिर बिगार्दै जाने पद्धतिको अन्त्य गरेर बिकासलाई दिगो बनाउने महानगरको दिशामा साथ दिन आग्रह गर्नुभयो । भवन निर्माणका बिषयमा जानकारी दिँदै वडाध्यक्ष कुश ढकालले — करीब २ रोपनी क्षेत्रफलमा भुइँतलासहित साढे चार तलाको भवन निर्माण गरिने बताउनुभयो । वडामा ठूला योजना सञ्चालन गर्न महानगरले पठाएको रकममध्ये ५० लाख रुपैयाँ भवन निर्माणका लागि उपलब्ध गराइनेछ । वडाध्यक्षको भनाइ थियो ।

कार्यक्रममा जेष्ठ नागरिक महासंघका अध्यक्ष एवं कलाकार मदनदास श्रेष्ठले — जेष्ठ नागरिकको सम्मान गर्ने संस्कारले सामाजिक व्यवस्था मिलाउन सजिलो हुने बताउनुभयो भने जेष्ठ नागरिक सेवा केन्द्रका उपाध्यक्ष प्रभातमणि (प्रवीण) ओझाले भवन निर्माणमा सहयोग गर्न संसद सदस्यहरुलाई आग्रह गर्नुभयो । 

भवन निर्माणका लागि ७ करोड रुपैयाँ लागत अनुमान गरिएको छ । भवन निर्माण गर्दा जेष्ठ नागरिकको आवतजावत तथा अन्य क्रियाकलापलाई मध्यनजर गरी जेष्ठ नागरिकमैत्री बनाइने सेवा केन्द्रले जनाएको छ ।

,

Pages